يا مصر هانت وبانت

يامصر هانت وبانت كلها كام يوم…
نهارنا نادي ونهار الندل مش باين
الدولة مفضلتش غير شويه شوم..
لو مش مصدق تعالي علي الميدان عاين
ياناس مفيش حاكم إلا من خيال محكوم..
واللي هيقعد في بيته بعدها خاين


اللي هيعقد كأنه سلم الثانين للأمن يايديه..وقاله هما ساكنين فين..
وصلت لضرب الرصاص علي الخلق في الميادين
حتى الجثث حجزوها اكمنهم خايفين..
يامصر أصبحنا أحياء وميتين مساجين
فاللي هيقعد في بيته يبقى مش مفهوم..
واللي هينزل الهي حارسه صاين
يامصر هانت وبانت كلها كام يوم
نهارنا نادي ونهار الندل مش باين
.
نهارنا نادي وبأيدينا علي فكرة..
الصبح عنده فضول راح نعمل إية بكرة.
إيده علي الباب وخايف يلمس الأكرة..
ادخل ياأستاذ براحتك والبلد حرة.
إحنا زهقنا نشوف الصبح من برة..
ادخل وخرج بقايا العتمة بالمرة
الناس ديه حرة وجنود الأمن مضطرة..

ياصبح طلعت روحنا لاجل تيجي ياخي.
طالعين نجبيها أهوا فى كل حارة وحي
..حتى لو ضربونا بالرصاص الحي.
شوف الميادين كدة مفروشة خلق وضي..
دايما مفاجأة ودايما وقتها معلوم.
الحكم لينا وليك الحق يامداين..
يامصر هانت وبانت كلها كام يوم .
نهارنا نادي ونهار الندل مش باين
..
ياصف عسكر بدل الدرع شيلو اثنين.
25 يناير ياشباب فاكرين
كان فيه انجليزووزير الداخلية تخين…
كان عنده برده عساكر زيكم جامدين.
سابهم يموتوا علولا لو سأل فيهم..
كانوا شبهكم اساميكم اساميهم.
ياعسكري البهوات اللي بتحميهم..
ممكن يردوا عليك لما تناديهم .

ياعسكري أنا أصلي بس بستغرب..
لو لاقي تأكل وتشرب قوم ياعم اضرب.
اضرب عشان الوزير من ضربتك يطرب..
لكن هتشتغل اية لما الوزير يهرب.

أما الشديد القوي القادر أبو القادر..
برميل تلامة نشر علي مصر من الآخر.
لو شافته معددة تكتب ادب ساخر..
ثابت يقول للهرم ياكابتن اتاخر.
ولم يزل معتقد ان الهرم هيقوم..
ادي الحجر والبشر قايمين ياسيد القوم.
والدين هيترد ياللي عشت متداين..
يامصر هانت وبانت كلها كام يوم.
نهارنا نادي ونهار الندل مش باين..

ده حكم أسرة ولا خوفو ولا خفرع.
ولا وجع بطن يتعالج بزيت خروع..
عمل مسوكر بعيد عنك ولايطلع.
جربنا فيه كل شىء ملقينا شىء ينفع..

منفعش بالأدوية جربنا ألف طبيب..
ولا بعطارة شيوخ ليهم بلح وزبيب.
ولا بجحفل مغولى وضرب بالقباقيب..
عمل مسوكر وسفلي شغل تل أبيب.

شغل أمريكا متغلف وختمة عليه..
ضيف زارنا ياعم من غير دعوة لابس بيه.
قاعد 30 سنة ومبيقولش قاعد لية..
والنية مديها لابنه النابغة بعديه.

ويقول قضا وقدر بين البشر محتوم..
قولناله طيب ومين قال للقدر معلوم
واش عرفك يافخمتك بالذي كاين..
يامصر هانت وبانت كلها كام يوم..
نهارنا نادي ونهار الندل مش باين.